Kulesihloko

•  Kuyini kuganana?

•  Sewukulungele yini kutsandzana nalotsite?

 Labanye bantfu batsatsa kuganana njengentfo yekuhambisa sikhatsi. Nobe kunjalo, kulesihloko “kuganana” kusho kucitsa sikhatsi nemuntfu webulili lobuhlukile kuze nibone kutsi ningashada yini. Ngako nawuganana nalotsite nisuke ninemgomo; akusiko nje kutsi nimane nijabulela kucitsa sikhatsi ndzawonye.

 Kuganana nalotsite kusho kutsi ngekuhamba kwesikhatsi nitawutsatsa sincumo, kungaba sincumo sekutsi niyashada nobe niyehlukana. Nawuganana nalotsite kufanele ukulungele kutsi nitawushada nobe nehlukane.

 Lokubalulekile: Nangabe ucabanga kutsi sewukulungele kuganana nalotsite, kufanele wati kutsi loko kusho kutsi sewukulungele nekushada.

 Kutsandzana nalotsite kungaholela emshadweni, ngako wenta kahle kucabangisisa ngekutsi ngubuphi buntfu lonabo lobungasita nobe bulimate lobudlelwane. Sibonelo nje, cabanga nganaku lokulandzelako:

•   Budlelwane nemndeni. Indlela lophatsa ngayo batali bakho kanye nebantfwana bakini, ikakhulukati nawucindzetelekile iveta indlela lotawuphatsa ngayo umuntfu lotawushada naye.

   Simiso seliBhayibheli: “Lahlani tonkhe tinhlobo tenzondo, intfukutselo, lulaka, umsindvo, inkhulumo lehlabako kanye nako konkhe lokulimatako.”​—Kubase-Efesu 4:31.

   Tibute: ‘Batali bami kanye nebantfwana bakitsi bangasho yini kutsi ngibaphatsa ngenhlonipho? Nangabe ngingaboni ngaso linye nalomunye wabo, ngiyakhona yini kulungisa tintfo ngemoya lophansi, nobe ngiyatfukutsela futsi ngiphikisane nabo?’

•   Kutidzela. Nangabe ushadile, kutawudzingeka kutsi ngaletinye tikhatsi ucabange ngaloko lokufunwa nguloyo loshade naye, futsi kudzingeke wente lokufunwa nguye kunalokufunwa nguwe.

   Simiso seliBhayibheli: “Nguloyo naloyo akangatifuneli lokusita yena, kodvwa akachubeke afuna lokusita lomunye umuntfu.”​—1 KubaseKhorinte 10:24.

   Tibute: ‘Ngihlale ngifuna kutsi tintfo tenteke ngendlela yami yini? Labanye bangitsatsa njengemuntfu locabangelako yini? Ngikhombise ngatiphi tindlela kutsi ngibeka tidzingo talabanye kucala kunetami?’

•   Kutfobeka. Umlingani wemshado lokahle uyawavuma emaphutsa akhe futsi acolise ngalokusuka enhlitiyweni.

   Simiso seliBhayibheli: “Sonkhe siyawenta emaphutsa tikhatsi letinyenti.”​—Jakobe 3:2, umbhalo longentasi.

   Tibute: ‘Ngiyawavuma yini vele emaphutsa ami, nobe ngibeka tama nangibutwa ngawo? Ngiyashesha yini kutsintseka nangabe bantfu bangeluleka?’

•   Indlela yekusebentisa imali. Umuntfu lokwati kusebentisa kahle imali angakhona kubalekela umsuka wetinkinga letinyenti emshadweni.

   Simiso seliBhayibheli: “Ngubani emkhatsini wenu lotsi nakafuna kwakha umbhoshongo angacali ahlale phansi abale tindleko kuze abone kutsi unako konkhe yini lokudzingekako kuze awucedze?”​—Lukha 14:28.

   Tibute: ‘Ngiyakhona yini kusebentisa kahle imali, nobe ngihlale nginetikweleti? Yini lekhombisa kutsi ngiyakhona kusebentisa kahle imali?’

•   Buhlobo bakho naNkulunkulu. Nangabe ungulomunye waboFakazi BaJehova, kufanele ngabe sewuneluhlelo lwekudadisha liBhayibheli nelwekuya emihlanganweni yebuKhristu.

   Simiso seliBhayibheli: “Bayajabula labo labanakisisa tintfo letiphatselene naNkulunkulu.”​—Matewu 5:3.

   Tibute: ‘Ngiyawenta yini umetamo kuze ngicinise kukholwa kwami? Indlela lengikhonta ngayo Nkulunkulu ita kucala yini ekuphileni kwami, nobe ngivumela letinye tintfo kutsi tingiphazamise?’

 Lokubalulekile: Umuntfu lotawushada naye ufanelwa ngumlingani lokahle. Nawetama kamatima kuba ngumuntfu lokahle, utawukhanga umuntfu lokahle.