•  Koko Ita-nia an

•  Tanbasá haʼu presiza hetan konsellu husi ema seluk?

•  Saida mak haʼu presiza halo atu bele simu konsellu?

•  Ita-nia kolega hanoin saida

 Dala ruma, ita hotu presiza hetan konsellu neʼebé bele ajuda ita atu hadiʼa liután ita-nia serbisu no hahalok. Hanoin toʼok situasaun balu tuirmai neʼe.

1.  ● Ita-nia mestre hatete katak Ita ladún halo didiʼak Ita-nia TPC. Mestre hatete: “Ó presiza uza tempu barak liután atu halo peskiza.”

    Saida mak Ita sei halo kuandu hetan konsellu hanesan neʼe?

   1.   La simu. (‘Haʼu-nia mestre la gosta haʼu.’)

   2.   Simu. (‘Haʼu sei aplika konsellu neʼe kuandu loron seluk haʼu halo TPC.’)

2.  ● Ita-nia amá hatete katak Ita-nia kuartu runguranga, maski loloos Ita hamoos ona.

    Saida mak Ita sei halo kuandu hetan konsellu hanesan neʼe?

   1.   La simu. (‘Amá nunka kontente ho haʼu.’)

   2.   Simu. (‘Karik haʼu tenke hamoos ho didiʼak liután.’)

3.  ● Ita-nia alin-feto hatete katak nia la gosta Ita-nia hahalok neʼebé sempre manda ema seluk.

    Saida mak Ita sei halo kuandu hetan konsellu hanesan neʼe?

   1.   La simu. (‘Nia hahalok aat liu fali haʼu, maibé fiar an korrije haʼu.’)

   2.   Simu. (‘Karik, haʼu bele hatudu laran-diʼak liután ba nia.’)

 Hanesan xikra neʼebé fasil atu rahun, joven balu sente an lalais no fasil tebes atu sai laran-kanek bainhira simu konsellu neʼebé loloos baibain deʼit. Ita mós hanesan neʼe ka lae? Se nuneʼe, Ita lakon boot! Tanbasá? Tanba se Ita hakarak simu konsellu, Ita bele sai ema neʼebé diʼak liu agora no iha futuru.

•   Tanba Ita la perfeitu. Bíblia hatete: “Ita hotu halo sala dala barak.” (Tiago 3:2) Tan neʼe mak ema hotu presiza hetan konsellu.

   “Haʼu sempre fó-hanoin haʼu-nia an katak ema hotu la perfeitu no halo beibeik sala. Tan neʼe, se ema fó konsellu mai haʼu, haʼu koko atu aplika konsellu neʼe hodi nuneʼe haʼu la halo tan sala neʼebé hanesan.”​—David.

•   Tanba Ita bele sai ema neʼebé diʼak liu. Bíblia hatete: “Fó matadalan ba ema matenek, no nia sei sai matenek liután.” (Provérbios 9:9) Tan neʼe, se Ita hakarak simu konsellu, Ita bele hetan benefísiu no sai ema neʼebé diʼak liu.

   “Uluk haʼu hanoin sala kona-ba konsellu. Haʼu hanoin katak se ita hetan konsellu, neʼe katak ita ema la diʼak. Maibé agora, haʼu simu konsellu no mós husu ema seluk nia sujestaun. Haʼu hakarak atu hatene saida tan mak haʼu presiza hadiʼa.”​—Selena.

 Tuir loloos, fasil ba Ita atu simu konsellu se Ita rasik mak husu ida-neʼe. Maibé se ema ruma derrepente fó konsellu mai ita, neʼe la fasil duni. Natalie simu karta ida neʼebé hakerek konsellu neʼebé nia lakohi rona, nia hatete: “Haʼu hakfodak no triste tebes. Haʼu hakaʼas an makaʼas ona, maibé haʼu hetan deʼit konsellu!”

 Ita mós hasoru ona situasaun hanesan Natalie ka lae? Se nuneʼe, oinsá mak Ita tahan situasaun neʼe?

•   Rona didiʼak.

   Bíblia hatete: “Ema neʼebé iha koñesimentu kuidadu kona-ba ninia liafuan sira, no ema neʼebé matenek sei kalma nafatin.” (Provérbios 17:27) Se ema ida fó konsellu ba Ita, keta korta ninia liafuan. No mós labele ansi atu defende Ita-nia an. Se Ita halo nuneʼe, Ita sei la koʼalia buat neʼebé Ita sei arrepende.

   “Se ema ida fó konsellu, haʼu lalais atu hirus. Maibé tuir loloos, haʼu presiza aprende husi konsellu neʼe no halo diʼak liután iha tempu seluk.”​—Sara.

•   Tau fokus ba konsellu, laʼós ba ema neʼebé fó konsellu.

   Bainhira ema ruma fó konsellu ba Ita, karik Ita hakarak tebes atu koʼalia sai ninia sala sira no fó konsellu ba nia. Maibé diʼak liu atu halo tuir Bíblia nia konsellu neʼebé hatete: “Lalais atu rona, la ansi atu koʼalia, no neineik atu hirus”. (Tiago 1:19) Baibain, konsellu neʼebé ema fó ba Ita mak loos. Tan neʼe, Ita presiza rona konsellu neʼe. Maibé se Ita lakohi simu konsellu neʼe, ikusmai Ita mak lakon.

   “Uluk bainhira haʼu-nia inan-aman korrije haʼu, haʼu toman atu hirus kedas no hatete: ‘Haʼu hatene ona, haʼu komprende ona.’ Maibé kuandu haʼu rona didiʼak ba sira no aplika sira-nia konsellu, haʼu hetan benefísiu diʼak barak.”​—Edward.

•   Iha hanoin loos kona-ba Ita-nia an.

   Se ema ruma fó konsellu ba Ita, neʼe la dehan katak Ita mak ema neʼebé aat. Loloos, neʼe mak buat neʼebé baibain, tanba ema hotu iha fraku. Ema neʼebé korrije Ita mós dala ruma presiza hetan konsellu husi ema seluk. Tuir loloos, Bíblia hatete: “La iha ema laran-loos ida iha rai neʼebé sempre halo deʼit buat diʼak.”​—Eclesiastes 7:20.

   “Haʼu-nia kolega ida fó konsellu mai haʼu, haʼu hanoin haʼu la presiza konsellu neʼe. Maski haʼu fó obrigadu tanba nia koʼalia nakloke ona, maibé haʼu sente laran-kanek. Liutiha tempu balu, haʼu foin hatene katak ninia konsellu mak loos. Haʼu hatene saida mak haʼu presiza hadiʼa. Se haʼu-nia kolega la fó-hatene haʼu, karik toʼo agora haʼu sei nunka hatene.”​—Sophia.

•   Halo planu atu sai ema neʼebé diʼak liután.

   Bíblia hatete katak “ema matenek simu konsellu”. (Provérbios 15:5) Bainhira ema fó konsellu, Ita bele sente laran-kanek. Maibé se Ita hakarak simu konsellu neʼe, Ita sei la laran-kanek tan no Ita sei fokus liu atu sai ema neʼebé diʼak liu. Hakerek saida deʼit mak Ita presiza halo atu hadiʼa an. Tuirmai durante fulan balu, hakerek buat neʼebé Ita bele kumpre.

   “Ema neʼebé hakarak simu konsellu mak ema neʼebé laran-moos, tanba ita presiza laran-moos ba ita-nia an rasik atu bele rekoñese ita-nia sala, husu deskulpa no aprende husi ita-nia sala.”​—Emma.

 Lisaun importante: Bíblia hatete: “Besi kadi ho besi bele sai kroʼat, nuneʼe mós ema ida bele halo kroʼat ninia belun.” (Provérbios 27:17) Konsellu neʼebé pozitivu bele ajuda Ita sai ema neʼebé diʼak liu, iha tempu agora toʼo Ita sai boot.