Dala ruma ita sente hanesan ema sira neʼebé koʼalia liafuan sira tuirmai ka lae?

 “Haʼu sempre hanoin: ‘Oinsá se . . . ?’ ‘Oinsá se haʼu hetan asidente ho karreta?’ ‘Oinsá se aviaun neʼe monu?’ Haʼu hanoin barak kona-ba buat neʼebé baibain ema ladún hanoin barak.”​—Charles.

 “Haʼu sempre sente laran-susar. Haʼu halo haʼu-nia an kole loos maibé haʼu la kumpre buat ida.”​—Anna.

 “Kuandu ema hatete katak haʼu-nia situasaun diʼak liu tanba sei eskola hela, haʼu hanoin: ‘Sira la komprende katak eskola halo haʼu sente estrese loos.’”​—Daniel.

 “Haʼu sempre sente estrese. Haʼu sempre hanoin barak kona-ba saida mak sei akontese ka saida haʼu presiza halo.”​—Laura.

 Realidade: Kona-ba ita-nia tempu Bíblia hatete katak “sei iha problema barak neʼebé susar atu tahan”. (2 Timóteo 3:1) Tan neʼe, joven sira bele sente laran-susar hanesan ho ema-boot sira.

 Resposta mak lae. Tuir loloos, Bíblia dehan katak la sala ba ema atu sente laran-taridu ka hanoin barak kona-ba oinsá atu halo kontente ema neʼebé sira hadomi.​—1 Korinto 7:​32-34; 2 Korinto 11:28.

 No mós laran-susar bele motiva ita atu kumpre buat neʼebé ita presiza halo. Porezemplu, semana oin Ita presiza tuir ezame iha eskola. Laran-susar sei motiva Ita atu estuda semana neʼe no karik neʼe sei ajuda Ita atu hetan valór neʼebé diʼak liu.

 Dala ruma mós laran-susar ajuda Ita hatene katak Ita iha situasaun perigu. Joven ida naran Serena hatete: “Karik ita sente laran-susar tanba ita hatene katak ita halo daudaun sala no ita presiza halo mudansa atu nuneʼe ita-nia konxiénsia la fó sala ba ita.”​—Kompara ho Tiago 5:14.

 Realidade: Laran-susar bele ajuda ita, naran katak ida-neʼe book ita iha dala neʼebé diʼak.

 Maibé oinsá se Ita sempre iha hanoin negativu tanba Ita laran-susar?

 Ezemplu: Richard neʼebé tinan 19 hatete: “Haʼu sente laran-susar kuandu haʼu hanoin kona-ba rezultadu oioin neʼebé bele mosu husi situasaun estrese. Haʼu hanoin beibeik kona-ba situasaun neʼe no neʼe halo haʼu laran-susar tebes.”

 Bíblia hatete katak “laran neʼebé kalma fó moris ba isin”. (Provérbios 14:30) Maibé laran-susar bele hamosu moras seluk hanesan ulun-moras, oin halai, kabun moras no fuan tuku-tuku makaʼas.

 Saida mak Ita bele halo se sentimentu laran-moras halo Ita sente moras duké ajuda Ita?

•   Buka-hatene se Ita iha razaun diʼak atu sente laran-susar. “La sala atu hanoin kona-ba responsabilidade sira neʼebé ita presiza kumpre, maibé la diʼak atu hanoin barak demais kona-ba buat sira-neʼe.”​—Katherine.

   Bíblia hatete: “Imi ida-neʼebé mak hodi hanoin resin bele hanaruk ninia moris ba tempu uitoan tan?”​—Mateus 6:27.

   Neʼe katak: Se laran-susar la ajuda Ita rezolve problema ruma, ikusmai laran-susar sei halo Ita-nia problema sai aat liután. Ka laran-susar sei sai Ita-nia problema.

•   Hanoin deʼit kona-ba loron ida-idak. “Hanoin toʼok, karik buat neʼebé halo ita hanoin barak ohin, karik ita sei la hanoin tan aban, fulan oin, tinan oin ka tinan lima ba oin.”​—Anthony.

   Bíblia hatete: “Keta hanoin resin kona-ba loron aban, tanba loron aban iha ninia susar rasik. Loron ida-idak iha ninia problema rasik.”​—Mateus 6:34.

   Neʼe katak: Ladún diʼak se Ita hanoin kona-ba saida mak sei akontese ba loron aban tanba karik ikusmai buat neʼebé Ita hanoin sei la akontese.

•   Simu realidade katak iha situasaun balu neʼebé Ita labele troka. “Ita bele koko atu prepara an ba situasaun balu tuir ita-nia kbiit. Maibé ita presiza simu realidade katak iha situasaun balu neʼebé ita labele kontrola.”​—Robert.

   Bíblia hatete: “Laʼós ema neʼebé halai lalais mak sempre manán halai-taru . . . no laʼós ema neʼebé iha koñesimentu mak sempre hetan susesu, tanba tempu susar no situasaun neʼebé mosu derrepente deʼit kona sira hotu.”​—Eclesiastes 9:11.

   Neʼe katak: Dala ruma Ita labele troka Ita-nia situasaun, maibé Ita bele troka Ita-nia hanoin kona-ba Ita-nia situasaun.

•   Iha hanoin neʼebé loos kona-ba Ita-nia situasaun. “Haʼu presiza tau fokus ba situasaun tomak no labele sai estrese kona-ba buat kiʼik-kiʼik. Haʼu presiza deside saida mak importante liu no uza haʼu-nia enerjia atu halo buat sira-neʼe.”​—Alexis.

   Bíblia hatete: “Buka-hatene loloos buat sira neʼebé importante liu.”​—Filipe 1:10.

   Neʼe katak: Ema neʼebé hanoin neʼebé deʼit kona-ba buat neʼebé sira presiza atu hanoin ikusmai bele hamenus sira-nia laran-susar.

•   Koʼalia ba ema ruma. “Bainhira haʼu tinan 11, haʼu sente laran-susar tebes kuandu haʼu fila husi eskola, no haʼu hanoin barak kona-ba loron aban. Haʼu-nia inan-aman rona ba haʼu bainhira haʼu fó sai haʼu-nia sentimentu. Haʼu kontente sira rona ba haʼu. Haʼu bele fiar sira no koʼalia nakloke ba sira. Ida-neʼe ajuda haʼu atu tahan hasoru loron tuirmai.”​—Marilyn.

   Bíblia hatete: “Hanoin resin mak halo ema sente laran-todan, maibé liafuan neʼebé diʼak mak halo ema sente laran-haksolok.”​—Provérbios 12:25.

   Neʼe katak: Karik Ita-nia inan-aman ka belun bele fó sujestaun ba Ita kona-ba oinsá atu hamenus Ita-nia laran-susar.

•   Orasaun. “Halo orasaun ho lian ajuda haʼu. Neʼe ajuda haʼu atu koʼalia sai buat neʼebé halo haʼu hanoin barak duké neʼe metin deʼit iha haʼu-nia neon. Orasaun mós ajuda haʼu hatene katak Jeová boot liu haʼu-nia laran-susar.”​—Laura.

   Bíblia hatete: “Entrega imi-nia laran-susar hotu ba [Maromak], tanba nia hanoin imi.”​—1 Pedro 5:7.

   Neʼe katak: Orasaun laʼós dalan atu rezolve Ita-nia problema mesak. Neʼe mak dalan atu komunika ho Maromak Jeová, neʼebé promete: “Keta laran-taridu, tanba haʼu mak ó-nia Maromak. Haʼu sei hametin ó, sin, haʼu sei ajuda ó.”​—Isaias 41:10.