ማርያም ካብ እትጠንስ ራብዓይ ወርሓ ሒዛ ነበረት። እቲ ናይ መጀመርታ እዋን ጥንሳ ናብ ደቡብ ናብ ዅርባታት ይሁዳ ኸይዳ ንኤልሳቤጥ ኣብ ምብጻሕ ከም ዘሕለፈቶ ትዝክሮ ትኸውን። ድሕሪኡ ግና ናብ ናዝሬት ናብ ዓዳ ተመልሰት። ጥንሳ ግሁድ ዚዀነሉ ግዜ ይመጽእ ነይሩ እዩ። ኣብ ከመይ ዝበለ ዜጨንቕ ኵነታት ከም ዝነበረት እሞ ገምቶ!

ነቲ ዅነታታ ዘጋደዶ ኸኣ፡ ማርያም ንዮሴፍ እቲ ጸራቢ ተሓጽያ ብምንባራ እዩ። ብመሰረት እቲ ኣምላኽ ንእስራኤላውያን ዝሃቦም ሕጊ ኸኣ፡ ሓንቲ እተሓጽየት ሰበይቲ ፈትያ ምስ ካልእ ሰብኣይ ጾታዊ ርክብ ምስ እትገብር፡ ብዳርባ እምኒ ኽትቅተል ከም ዘለዋ ትፈልጥ ነይራ እያ። (ዘዳግም 22:23, 24) ስለዚ፡ ዋላ እኳ እንተ ዘይመንዘረት፡ ንዮሴፍ ብዛዕባ ጥንሳ ኸመይ ገይራ ኸም እትገልጸሉን እንታይ ከም ዜጋጥማን ሓሲባ ኽትከውን ኣለዋ።

ማርያም ንሰለስተ ወርሒ ገይሻ ስለ ዝነበረት፡ ዮሴፍ ኪረኽባ ኸም ዚህንጠ ኽንግምት ንኽእል ኢና። ምስ ተራኸቡ ኸኣ፡ ማርያም ብዛዕባ ዅነታታ ነገረቶ፣ ብናይ ኣምላኽ መንፈስ ቅዱስ ከም ዝጠነሰት ክትገልጽ ዚከኣላ ገይራ ኽትከውን ኣለዋ። ዮሴፍ ግና ነቲ ዝነገረቶ ንምርዳኡን ንምእማኑን ኣመና ኸበዶ።

ዮሴፍ፡ ማርያም ጥዕይቲ ምንባራን ጽቡቕ ስም ከም ዝነበራን ይፈልጥ ነይሩ እዩ። ኣጸቢቑ ድማ እዩ ዚፈትዋ ነይሩ። እንተዀነ ግና፡ ዝበለት እኳ እንተ በለት፡ ካብ ካልእ ሰብ ዝጠነሰት እዩ መሲልዎ። ይኹን እምበር፡ ብዳርባ እምኒ ኽትቅተል ወይ ከኣ ኣብ ቅድሚ ህዝቢ ኽትዋረድ ኣይደለየን። ስለዚ፡ ብምስጢር ኪፈትሓ ሓሰበ። ኣብቲ ግዜ እቲ እተሓጽዩ ሰባት ከም እተመርዓዉ እዩ ዚሕሰብ ነይሩ፣ ሕጸኦም ኬፍርሱ እንተ ዀይኖም ድማ፡ ኪፋትሑ ነበሮም።

ጸኒሑ ኸኣ፡ ዮሴፍ ብዛዕባ እዚ ነገራት እዚ ኣብ ውሳነ ኸይበጽሐ ኸሎ ደቀሰ። መልኣኽ የሆዋ ኸኣ ብሕልሚ ተራእዮ እሞ፡ “ሕጽይትኻ ማርያም ጠኒሳቶ ዘላ ኻብ መንፈስ ቅዱስ እዩ እሞ፡ ናብ ቤትካ ንምውሳዳ ኣይትፍራህ። ወዲ  ኽትወልድ እያ፣ ንሱ ኸኣ ንህዝቡ ኻብ ሓጢኣቶም ኬድሕኖም እዩ እሞ፡ ስሙ የሱስ ክትብሎ ኢኻ” በሎ።—ማቴዎስ 1:20, 21።

ዮሴፍ ምስ ተበራበረ፡ ኣየ ኽሳዕ ክንደይ ኰን እዩ እተሓጐሰ! ከይተደናጐየ ኸምቲ እቲ መልኣኽ ዝሃቦ መምርሒ ገበረ። ንማርያም ናብ ቤቱ ወሰዳ። እዚ ብግህዶ እተወስደ ስጕምቲ፡ ዮሴፍን ማርያምን ከም እተመርዓዉ ዜፍልጥ እዩ ነይሩ። ይኹን እምበር፡ ማርያም ንየሱስ ጠኒሳ ኸላ፡ ዮሴፍ ምስኣ ጾታዊ ርክብ ኣይገበረን።

ማርያም ብጽሕቲ ወርሒ ኸላ፡ ዮሴፍን ማርያምን ካብ ዓዶም ናዝሬት ናብ ካልእ ቦታ ኺጕዓዙ ነበሮም። ማርያም ሕርሳ ቐሪቡ ኸሎ ናበይ እዮም ኪኸዱ ዝነበሮም፧