•  म सधैं, धेरैजसो, कहिलेकाहीं, कहिल्यै पनि . . . छु/छैनँ।

  •  इमानदार

  •  भरपर्दो

  •  समयनिष्ठ

  •  मेहनती

  •  व्यवस्थित

  •  निष्पक्ष

  •  दयालु

•   यीमध्ये कुनचाहिं गुण तपाईंमा धेरै छ?

   ती गुणहरूमा अझै प्रगति गर्दै जानुहोस्‌।—फिलिप्पी ३:१६.

•   कुनचाहिं गुण विकास गर्न तपाईंले अझ मेहनत गर्नुपर्छ?

 निम्न जानकारीले ती गुणहरू विकास गर्न मदत गर्नेछ।

 एक जिम्मेवार व्यक्‍तिले आफ्नो घर, स्कुल र समाजमा आफ्नो कर्तव्य पूरा गर्छ। आफूले गरेको कामको जिम्मेवारी आफैले लिनुपर्छ भन्‍ने कुरा बुझेको हुन्छ। त्यसैले उसले गल्ती गऱ्‍यो भने आफ्नो गल्ती मानिलिन्छ, माफी माग्छ र गल्ती सुधार्न सकेसम्म प्रयास गर्छ।

   बाइबल भन्छ: “हरेकले आफ्नो भारी आफै बोक्नेछ।”—गलाती ६:५.

  जिम्मेवार व्यक्‍तिले आफूसँग भएको सीप र कला बुद्धिमानी भई प्रयोग गर्छ। सबैले उसलाई भरोसा गर्छन्‌, जसले गर्दा उसले थप स्वतन्त्रता र सुअवसर पाउँछ।

   बाइबल भन्छ: “आफ्नो काममा सिपालु कुनै मानिसलाई तँ देख्छस्‌? त्यसले राजाहरूका सामु सेवा गर्नेछ।”—हितोपदेश २२:२९, NRV.

जिम्मेवार व्यक्‍ति उदार मनको हुन्छ र उसका असल साथीहरू हुन्छन्‌।

  बाइबल भन्छ: “दिने गर अनि मानिसहरूले तिमीहरूलाई पनि दिनेछन्‌।”—लूका ६:३८.

जिम्मेवार व्यक्‍ति कुनै काम पूरा गर्न सकेकोमा खुसी हुन्छ, जसले गर्दा उसको आत्मविश्‍वास पनि बढ्‌दै जान्छ।

  बाइबल भन्छ: “तर हरेकले आफ्नो काम जाँचोस्‌, तब उसले अरूसित तुलना गरेर होइन तर आफ्नै काममा रमाउने कारण पाउनेछ।”—गलाती ६:४.

 यो प्रश्‍नको जवाफ पत्ता लगाउन तल दिइएका टिप्पणीहरू पढ्‌नुहोस्‌। तपाईंको विचार कुन टिप्पणीसँग मिल्दोजुल्दो छ?

  “मलाई सधैं बच्चा जस्तो व्यवहार गर्नुभएको देखेर वाक्कै लाग्छ। एक घण्टा बाहिर निस्कन पनि ममी-ड्याडीलाई सोध्नुपर्ने!”—केरी

 “मेरो ममी-ड्याडीले मलाई साथीहरूसँग बाहिर जान कुनै रोकटोक गर्नुहुन्‍न।”—रिचार्ड

 “मेरा साथीहरूले विभिन्‍न कुरा गर्न छुट पाएको देख्दा अचम्म लाग्छ। ममी-ड्याडीले मलाई त्यस्तो गर्न किन दिनुहुन्‍न?”—आन

 “ममी-ड्याडीले मलाई जे मन लाग्छ, त्यही गर्न दिनुहुन्छ। त्यस्तो स्वतन्त्रता पाएकोमा एकदम खुसी छु।”—मरिना

 निष्कर्ष: केही युवाहरूलाई तुलनात्मक रूपमा धेरै स्वतन्त्रता दिइएको हुन्छ। किन यस्तो हुन्छ?

 तथ्य: तपाईंले अरूको भरोसा जत्ति जित्नुहुन्छ, त्यत्ति नै स्वतन्त्रता पाउन सक्नुहुन्छ।

 माथि उल्लेख गरिएका दुई युवाको उदाहरण विचार गरौं।

 रिचार्ड: “कुनै समय ममी-ड्याडीलाई मैले स्वतन्त्रताको सदुपयोग गर्न सक्दिनँ जस्तो लाग्थ्यो। तर जिम्मेवार भई स्वतन्त्रताको प्रयोग गरेको हुनाले अहिले उहाँहरू मलाई भरोसा गर्नुहुन्छ। म कहाँ अनि कोसित जाँदै छु भन्‍ने कुरा उहाँहरूलाई लुकाउँदिनँ। बरु उहाँहरूले सोध्नुअघि नै आफ्नो योजनाबारे बताउँछु।”

 मरिना: “ममी-ड्याडीलाई अहिलेसम्म दुई चोटि मात्र झूट बोलेको छु। दुवै पटक उहाँहरूले मेरो झूट पक्रनुभयो। त्यसपछि बल्ल इमानदार हुन सिकें। उदाहरणको लागि, म के गर्दै छु भनेर उहाँहरूलाई सधैं बताउँछु अनि म बाहिर हुँदा फोन गर्छु। अहिले उहाँहरू मलाई धेरै भरोसा गर्नुहुन्छ।”

 के तपाईं पनि रिचार्ड र मरिनाको जस्तै स्वतन्त्रता चाहनुहुन्छ? निम्न क्षेत्रमा आफैलाई जाँच्नुहोस्‌:

आफ्नो घरमा

•   के तपाईं घरको काम राम्ररी पूरा गर्नुहुन्छ?

•   के तपाईं तोकिएकै समयमा घर आउने-जाने गर्नुहुन्छ?

•   के तपाईं आफ्नो भाइबहिनीलाई माया र ममी-ड्याडीलाई आदर गर्नुहुन्छ?

 यीमध्ये कुनचाहिं बुँदामा काम गर्नुपर्छ जस्तो लाग्छ?

  बाइबल भन्छ: “आफ्ना आमाबाबुप्रति आज्ञाकारी होओ।”—एफिसी ६:१.

स्कुलको पढाइमा

•   के तपाईं आफ्नो गृहकार्य समयमै सिध्याउनुहुन्छ?

•   के तपाईं आफ्नो पढाइमा उन्‍नति गर्न मेहनत गर्दै हुनुहुन्छ?

•   के तपाईंको अध्ययन गर्ने राम्रो बानी छ?

 यीमध्ये कुनचाहिं बुँदामा काम गर्नुपर्छ जस्तो लाग्छ?

 बाइबल भन्छ: “बुद्धिलाई चिन्‍नेले त्यसबाट जीवन पाउँछ।” (उपदेशक ७:१२) राम्रो शिक्षाले तपाईंको बुद्धि बढाउँछ।

तपाईंले कमाउनुभएको नाम

•   के तपाईं आमाबाबुप्रति इमानदार हुनुहुन्छ?

•   के तपाईं पैसाको उचित प्रयोग गर्न सक्नुहुन्छ?

•   तपाईं भरोसा गर्न योग्य हुनुहुन्छ भन्‍ने कुरामा तपाईंको राम्रो नाम चलेको छ?

 यीमध्ये कुनचाहिं बुँदामा काम गर्नुपर्छ जस्तो लाग्छ?

 बाइबल भन्छ: “नयाँ व्यक्‍तित्व धारण गर्नुपर्छ।” (एफिसी ४:२४) तपाईं आफ्नो बानी सुधार्न सक्नुहुन्छ र राम्रो नाम कमाउन सक्नुहुन्छ।