EMINYAKENI leminyenti ngembi kwekutsi ema-Israyeli angene eKhenani, Jehova abetsembise kutsi lelive utawulinika situkulwane sa-Abrahama. Aholwa nguJoshuwa, ema-Israyeli abesatawungena kuleLive leSetsembiso.

Nkulunkulu abetawubhubhisa bantfu baseKhenani. Kulo lonke lelive, besekugcwele kutiphatsa lokubi ngekwelicansi kanye nekubulala. Onkhe emadolobha aseKhenani labetawutsatfwa ngema-Israyeli, abetawubhujiswa.

Ngembi kwekungena kulelive, Joshuwa watfumela tinhloli letimbili edolobheni laseJerikho, letafike tangenisa emtini waRahabi. Watemukela futsi wativikela, nobe-nje bekati kutsi tingema-Israyeli. ­Rahabi abenelukholo kuNkulunkulu wema-Israyeli, ngoba abevile ngendlela labewasindzise ngayo. Wacela kutsi tifunge kutsi yena nemndeni wakhe ngeke babulawe.

Lapho ema-Israyeli angena eJerikho, ngalokusimangaliso Nkulunkulu wabangela kutsi tindvonga taseJerikho tiwe. Emabutfo aJoshuwa agijimela ngekhatsi futsi alibhubhisa lelidolobha, kodvwa asindzisa Rahabi nemndeni wakhe. Etimphini letinyenti letatsatsa iminyaka lesitfupha, Joshuwa watsatsa tincenye letinkhulu taleLive leSetsembiso. Ngemva kwaloko, lelive lahlukaniselwa tive taka-Israyeli.

Asatawukufa, Joshuwa wabita bonkhe bantfu. Wabakhumbuta ngendlela Jehova laphatsa ngayo bokhokho babo futsi wabuye wabakhutsata kutsi bamkhonte. Ngemva kwekufa kwaJoshuwa kanye nemadvodza labesebenta nawo, ema-Israyeli amshiya Jehova ase akhonta bonkulunkulu bemanga. Eminyakeni lengaba ngu-300, lesive asichubekanga nekulalela imitsetfo yaJehova. Ngaleso sikhatsi, Jehova wavumela titsa tema-Israyeli, njengemaFilisti kutsi tiwacindzetele. Kwatsi lapho ema-Israyeli acela lusito lwaKhe, wamisa tikhulu letingu-12 kutsi tiwasindzise.

Lesikhatsi saletikhulu lesichazwe encwadzini yeTikhulu, sacala nga-Othniyeli sagcina nga-Samsoni lebekayindvodza lenemandla kwendlula onkhe lake aphila. Liciniso lelivetwa njalo kuletindzaba letijabulisako letikulencwadzi yeliBhayibheli yeTikhulu nguleli: Kulalela Jehova kuholela etibusisweni, kepha kungalaleli kuholela enhlekeleleni.

—Lendzaba itsetfwe encwadzini yaJoshuwa; Tikhulu; Levithikhusi 18:24, 25.