BEKUTAWUBA njani kuphila kube sonkhe sive kanye nembusi waso besilandzela Jehova njengeNkhosi yaso, futsi silalela imitsetfo yaKhe? Imphendvulo yavetwa eminyakeni lengu-40 yekubusa kweNkhosi Solomoni.

Ngembi kwekutsi Davide afe, wamisa indvodzana yakhe Solomoni kutsi itsatse sikhundla sakhe. Ephusheni Nkulunkulu watjela Solomoni kutsi akacele noma yini layifunako. Solomoni wacela inhlakanipho nelwati lwekwehlulela bantfu ngekulunga nangekuhlakanipha. Jehova wajabula ngaloku, wase upha Solomoni kuhlakanipha nekucondza. Waphindze wametsembisa kumupha umcebo, ludvumo kanye nemphilo lendze, kuphela-nje uma ayohlala amlalela.

Solomoni watiwa kakhulu ngekwehlulela kwakhe ngekuhlakanipha. Kwake kwenteka bafati lababili bebabanga umntfwana longumfana, ngamunye wabo bekatsi ungumake walomntfwana. Solomoni watsi lomntfwana akajutjwe ekhatsi kute kutsi ngamunye wabo atfole luhlangotsi. Lomunye wabo wavuma, kodvwa lona lekwakunguye make walomntfwana, wacela kutsi lomntfwana angabulawa kodvwa anikwe lolomunye umfati. Solomoni kwamkhanyela kutsi lomake lonelutsandvo ungunina walomntfwana, futsi watsi akaniketwe umntfwana wakhe. Ngekushesha onkhe ema-Israyeli eva ngalesijubo lesihle kangaka, futsi bantfu baphawula kutsi Solomoni unekuhlakanipha lokuvela kuNkulunkulu.

Lomunye wemisebenti lemikhulu leyentiwa nguSolomoni, bekukwakha lithempeli laJehova—sakhiwo lesihle lebesiseJerusalema, lapho ema-Israyeli abekhulekela khona. Lapho Solomoni aniketela lithempeli wathandaza watsi: “Emazulu, ngisho nalo lizulu leliphakeme kunawo wonkhe emazulu, ungeke wenele kulo. Kangakanani-ke lelithempeli lengikwakhele lona!”—1 Emakhosi 8:27.

Bantfu labanyenti bakuletinye tindzawo njengaseSheba lese-Arabiya, beva ngetidvumo taSolomoni. Indlovukati yaseSheba yahamba yayotibonela inkatimulo, nemcebo waSolomoni, kanye nekuyovivinya lizinga lekuhlakanipha kwakhe. Lendlovukati yajabula kakhulu ngekubona inhlakanipho yaSolomoni kanye nemphumelelo yema-Israyeli. Yadzimate yadvumisa Jehova ngekubeka kwakhe inkhosi lehlakaniphe kangaka. Ngenca yekutsi Solomoni abebusiswe nguJehova, umbuso wakhe waphumelela futsi waba nekuthula kunayo yonkhe imibuso yaka-Israyeli.

Lokuvisa buhlungu kutsi Solomoni wehluleka kuchubeka nekuphila ngendlela lekhombisa kutsi unenhlakanipho levela kuJehova. Ngekungawunaki umtsetfo waNkulunkulu, watsatsa bafati labanyenti, labanye babo bebakhonta tithico. Kancane kancane labafati bakhe bamlahlisa Jehova futsi bamenta kutsi naye akhonte tithico. Jehova wabese utjela Solomoni kutsi utawutsatsa incenye yembuso wakhe. Nkulunkulu wachubeka ngekutsi incenyana yembuso itawusala emndenini waSolomoni ngenca yesitsembiso lasenta naDavide. Nanobe Solomoni ayekela kukhonta Jehova, kepha Jehova wahlala etsembekile esivumelwaneni seMbuso lasenta naDavide.

—Lendzaba itsetfwe encwadzini yeku-1 Emakhosi, sehluko 1 kuya ku-11; 2 Tikhronike, sehluko 1 kuya ku-9; Dutheronomi 17:17.