NGEMUVA kwemalanga lalishumi Jesu enyukele ezulwini, bafundzi bakhe labangaba ngu-120 babutsana ndzawonye eJerusalema ngesikhatsi semkhosi wemaJuda wePhentekhoste langa-33 C.E. Kwatsi kusenjalo kwevakala umsindvo lonjengewemoya lohhushako ugcwala indlu lebebahleti kuyo. Ngalokusimangaliso bafundzi bacala kukhuluma tilwimi labebangatati. Konkhe loku kwenteka ngobe Nkulunkulu bekanike labafundzi umoya longcwele.

Ngephandle, kwakunesicumbi sebantfu, ngobe kwakunetivakashi letibuya kuletinye tindzawo nato lebetite kulomkhosi. Labantfu bebamangele ngekuva bafundzi baJesu bakhuluma tilwimi tabo. Achaza ngaloko lokwakwentekile, Phetro wacaphuna siphrofetho semphrofethi Joweli sekutsi Nkulunkulu ‘uyawutfululela’ umoya wakhe etikwabo bonkhe bantfu loyawubanika emandla ekwenta timangaliso. (Joweli 2:28, 29) Lokufika kwemoya longcwele kwenta kwacaca kutsi kunelushintjo lolubalulekile lolwalwentekile: Umusa waNkulunkulu besewusukile kuma-Israyeli waya ebandleni lebuKhristu lelalisandza kusungulwa. Labo lebebafuna kukhonta Nkulunkulu ngendlela layemukelako kwakufanele babe balandzeli baKhristu.

Ngaleso sikhatsi kuphikiswa kwakhula kakhulu, futsi titsa tafaka labafundzi ejele. Kwatsi ebusuku ingilosi yaJehova yavula iminyango yelijele, futsi yatjela labafundzi kutsi abachubeke nekushumayela. Kwatsi nakusa, labafundzi bachubeka nekushumayela. Bangena ethempelini futsi bacala kushumayela liVangeli lelalimayelana naJesu. Titsa tabo tatfukutsela tatselwa ngemanti, futsi tabatjela kutsi abayekele kushumayela. Ngesibindzi, baphostoli baphendvula batsi: “Kufanele silalele Nkulunkulu kunekulalela bantfu.”—Imisebenti YebaPhostoli 5:28, 29.

Kushushiswa kwachubeka kwandza. EmaJuda latsite amangalela Stefano ngelicala lekuhlambalata, futsi amgcoba ngematje waze wafa. Lijaha lelinguSawula waseThasusi lalibukela, futsi lavumelana nekubulawa kwakhe. Sawula wasuka lapho waya eDamaseko kuze abophe wonkhe umuntfu longumlandzeli waKhristu. Watsi asahamba, kwabaneka ndzawo tonkhe kukhanya lokhulu lokuvela ezulwini, futsi kwamenta wavaleka emehlo. Weva livi litsi kuye: “Sawula! YeSawula! Ungihluphelani?” Waphendvula watsi: “Ungubani, wena Nkhosi?” Livi laphendvula latsi: “NginguJesu.”—Imisebenti YebaPhostoli 9:3-5.

Ngemuva kwemalanga lamatsatfu, Jesu watfumela Ananiyase umfundzi kutsi ayekwelapha Sawula kute aphindze abone. Sawula wabhajatiswa, futsi wacala kushumayela ngaJesu ngesibindzi. Sawula wase ubitwa ngekutsi ngumphostoli Pawula, futsi waba lilunga lelikhutsele lelibandla lebuKhristu.

Bafundzi baJesu bebashumayela liVangeli ngeMbuso waNkulunkulu kumaJuda kanye nakumaSamariya kuphela. Ingilosi yafika kuKhoneliyusi lobekayindvuna yelibutfo laseRoma leyesaba Nkulunkulu, yamtjela kutsi akatfume bantfu bayewubita umphostoli Phetro. Ahamba nalabanye, Phetro washumayela kuKhoneliyusi kanye nakulabo lebekanabo. Ngesikhatsi Phetro asakhuluma, umoya longcwele wehlela kubo bonkhe betive labebamlalele, futsi wabatjela kutsi kufanele babhajatiswe egameni laJesu. Indlela leya ekuphileni lokuphakadze beseyivulekele bantfu bato tonkhe tive. Libandla laselikulungele kushumayela liVangeli kuyo yonkhe indzawo.

—Lendzaba itsetfwe encwadzini Yemisebenti YebaPhostoli 1:1–11:21.