ELANGENI lesitsatfu ngemuva kwekufa kwaJesu, bafati labatsite lebebabafundzi bakhe, batfola litje lebelivale umnyango welithuna ligicitelwe eceleni, futsi lithuna lalingenamuntfu!

Tingilosi letimbili tabonakala kubo, futsi lenye yato yatsi: “Nifuna Jesu waseNazaretha. Uvusiwe ekufeni.” (Makho 16:6) Ngaphandle kwekuphotisa emaseko, labafati bagijima bayotjela baphostoli ngaloku. Batsi basesendleleni, bahlangana naJesu. Watsi kubo: “Ningesabi! Hambani nibikele bomnaketfu kutsi, abahambe baye eGalile, bayawungibona khona.”—Matewu 28:10.

Ngalo lona lelolanga, bafundzi lababili babehamba besuka eJerusalema baya edolobhaneni i-Emawusi. Babona umuntfu labangamati ahamba nabo, futsi wababuta kutsi bebakhuluma ngani. Loyo muntfu kwakunguJesu lovusiwe, lowabonakala asesimweni lebebangeke bakhone ngisho nekumfanisa. Badzabukile, bamphendvula batsi bebakhuluma ngaJesu. Lomuntfu wacala kubachazela ngetintfo letisemiBhalweni letatimayelana naMesiya. Empeleni Jesu bekatigcwalise tonkhe tiphrofetho letatimayelana naMesiya. * Kwatsi lapho labafundzi sebabona kutsi lomuntfu labangamati labakhuluma naye nguJesu lovuswe anemtimba wemoya, wase uyanyamalala.

Labafundzi lababili babuyela eJerusalema ngekushesha. Bafike batfola lalabanye baphostoli babutsene ndzawonye endlini lekhiyiwe. Lapho basabacocela loko lokwentekile, Jesu waphindze wabonakala kubo. Bafundzi Bakhe lebebamangele abazange bakukholwe loko! Jesu wababuta watsi: “Ningabatelani etinhlitiyweni tenu?” Wachubeka watsi: “Naku lokubhaliwe kutsi Khristu ufanele kuhlupheka abulawe abuye avuswe ekufeni ngelilanga lesitsatfu.”—Lukha 24:38, 46.

Emalangeni langu-40 Jesu avusiwe, abetibonakalisa kubafundzi bakhe ngetindlela letingafani. Kulesinye sikhatsi watibonakalisa kubantfu labangetulu kwa-500! Ngaleso sikhatsi wabaniketa umsebenti lobalulekile, watsi: “Ngako-ke hambani, nente tive tonkhe tibe bafundzi bami, . . . nibafundzise kugcina konkhe lenginiyale ngako. Nibokwati kutsi mine nginani onkhe emalanga, kuze kube ngusekupheleni kwetikhatsi.”—Matewu 28:19, 20.

Ekuhlanganeni kwakhe kwekugcina nebaphostoli bakhe labangu-11, Jesu wabetsembisa watsi: ‘Nine nitawugcwaliswa ngemandla, nasewufikile kini umoya longcwele, niyawuba bofakazi bami . . . kuze kube ngusekugcineni kwemhlaba.’ (Imisebenti YebaPhostoli 1:8) Emva kwekusho loko wenyuselwa ezulwini, futsi lifu lamsitsa kutsi bangamboni njengoba enyuka.

—Lendzaba itsetfwe encwadzini yaMatewu sehluko 28; Makho sehluko 16; Lukha sehluko 24; Johane sehluko 20 na-21; 1 kubaseKhorinte sehluko 15:5, 6.