JAKOBE kanye naJuda bekubanakabo Jesu. Phetro kanye naJohane bebangulabanye bebaphostoli baJesu labangu-12. Lamadvodza lamane abhala tincwadzi letisikhombisa letitfolakala emiBhalweni yemaKhristu yesiGriki. Ngayinye yaletincwadzi ibitwa ngeligama laloyo lowayibhala. Leseluleko lesiphefumulelwe lesitfolakala kuletincwadzi sasihloselwe kusita emaKhristu kutsi ahlale acotfo kuNkulunkulu naseMbusweni wakhe.

EmaKhristu kufanele abe nelukholo. Kumane utsi uyakholwa akukeneli. Lukholo lolungulonalona luholela esentweni. Jakobe wabhala watsi: “Ngalokufananako nekukholwa nakute imisebenti kufile.” (Jakobe 2:26) Kuba nelukholo lapho uvivinywa kuveta kucinisela. Kuze aphumelele, umKhristu kufanele acele kuhlakanipha kuNkulunkulu, aciniseka kutsi utawumnika kona. Kucinisela kona kuholela ekwemukelweni nguNkulunkulu. (Jakobe 1:2-6, 12) Nangabe sikhonti saNkulunkulu sihlala sicotfo kuye, naye utawuba cotfo kuso. Jakobe watsi: “Sondzelani kuNkulunkulu, naye utawusondzela kini.”—Jakobe 4:8.

Lukholo lwemKhristu kufanele lube ngulolucinile kuze lumsite akhone kuncoba tilingo kanye nekutiphatsa lokubi. Kutiphatsa lokubi lobekwandza kwaphocelela Juda kutsi acele emaKhristu lebekakanye nawo kutsi: ‘Alwele kukholwa.’—Juda 3.

EmaKhristu kufanele atiphatse kahle. Jehova ulindzele kutsi tikhonti takhe tibe ngcwele, lokusho kutsi tihlobe ngato tonkhe tindlela. Phetro watsi: ‘Banini ngcwele kuko konkhe kuhamba kwenu. Ngoba umBhalo utsi: “Banini ngcwele, ngobe nami ngingcwele.”’ (1 Phetro 1:15, 16) EmaKhristu anesibonelo lesihle lokufanele asilandzele. Phetro watsi: “Khristu naye wanihluphekela, wanishiyela sibonelo sekutsi nimlandzele etinyatselweni takhe.” (1 Phetro 2:21) Nobe kungahle kwenteke emaKhristu ahlupheke ngenca yekulandzela timiso taNkulunkulu tekutiphatsa, aba “nanembeza lomsulwa.”(1 Phetro 3:16, 17) Phetro wancusa emaKhristu kutsi atiphatse kahle ngato tonkhe tikhatsi, lokubonisa kutsi atinikele ngalokuphelele kuNkulunkulu njengoba alindzele kufika kwelilanga lakhe kanye nelive lelisha leletsenjisiwe, lapho ‘kuyawubusela khona kulunga.’—2 Phetro 3:11-13.

EmaKhristu kufanele atsandzane. Johane wabhala watsi: “Nkulunkulu ulutsandvo.” Lomphostoli waveta kutsi Nkulunkulu wabonisa lutsandvo lwakhe ngekutfumela Jesu kutsi abe “yinhlawulo yetono tetfu.” EmaKhristu kufanele enteni ngaloko? Johane wachaza watsi: “Batsandzekako, nangabe Nkulunkulu wasitsandza kangaka, natsi sifanele kutsi sitsandzane.” (1 Johane 4:8-11) Indlela yekubonisa lolutsandvo, kuphatsa bazalwane betfu ngemusa.—3 Johane 5-8.

Tikhonti taNkulunkulu tingabonisa kanjani kutsi tiyamtsandza? Johane waphendvula watsi: “Ngobe kutsandza Nkulunkulu kugcina imiyalo yakhe. Imiyalo yaNkulunkulu ayimatima kitsi.” (1 Johane 5:3; 2 Johane 6) Labo labachubeka batsandza Nkulunkulu batsenjiswa kutsi naye utawuchubeka abatsandza futsi utawubanika kuphila lokuphakadze.—Juda 21.

—Lendzaba itsetfwe encwadzini yaJakobe, 1 Phetro, na-2 Phetro, encwadzini ya-1 Johane, 2 Johane na-3 Johane, kanye nakuJuda.