Ikaambo ncomukonzya kuyeeya kucita boobu: Muyanda kutondezya beenzinyoko kuti mulaangulukide. Mulimvwa kuti muzyi zinji kwiinda bazyali banu, naa tamuzilemeki zyintu nzyobaamba.—Tusimpi 14:18.

 Zikonzya kucitika: Beenzinyoko balakonzya kukkomana, pele alimwi balaiya cintu cimwi kujatikizya ndinywe—kuti muli basilweeno. Ikuti kamucikonzya kweena bazyali banu nkokuti abeenzinyoko mulakonzya kubeena. Ikuti bazyiba bazyali banu, bayoobijilwa alimwi akulimvwa kuti beenwa, mpoonya tabanoomuzumizyi!—Tusimpi 12:15.

 Ikaambo ncomukonzya kuyeeya kucita boobu: Mwayeeya kuti kutambwa ooku takweendelani azyeelelo nzyomwakalibikkila naa kuti bamwi bakatambwa tabali balongwe bali kabotu. (1 Bakolinto 15:33; Bafilipi 4:8) Kulubazu lumwi, andiza mulayanda kuunka lino mulayoowa kubalomba bazyali banu.

 Zikonzya kucitika: Ikuti tiimwaunka akaambo kakuti muyeeya kuti muzeezo mubi, muyoocikonzya kubaingula beenzinyoko. Pele kuti tiimwaunka akaambo kakuti mulayoowa kubalomba bazyali banu, muyoojanika kuti mwalendelelwa kuŋanda akuti ndinywe nyolikke nomutayandi kucita zyakulikondelezya.

 Ikaambo ncomukonzya kuyeeya kucita boobu: Mulizyi kuti mweelede kubalemeka bazyali banu akaambo kanguzu zyakumweendelezya nzyobajisi alimwi akulemeka nzyobaamba. (Bakolose 3:20) Mulabayanda bazyali banu alimwi tamuyandi kubanyemya kwiinda mukuunka balo kabatazyi. (Tusimpi 10:1) Alimwi mulakonzya kuba acoolwe cakwaamba mbomulimvwa.

 Zikonzya kucitika: Bazyali banu bayoobona kuti mulabayanda akubalemeka. Alimwi kuti babona kuti ncomwalomba cili kabotu, balakonzya kumuzumizya.

 Kaambo kamwi kalakonzya kwaambwa kwiinda mucikozyanyo eeci: Ikuti mwayandika kusala, ambweni inga mwasala kudwaya kubusena kuli bantu bakonzya kumufwutula. Nkaambo nzi? Akaambo kakuti ciindi nomudwaya mumeenda, inga tamucibikkili maano kapati kuntenda zikonzya kumucitikila. Pele basikufwutula bakkede abusena bubotu mpobakonzya kubona ntenda iilangilwa kucitika. Mbubwenya buyo, akaambo kakuti bazyali banu bajisi luzyibo lunji, balakonzya kubona ntenda nzyomutakonzyi kubona nywebo. Mbubwenya mbuli basikufwutula bali kunkomwe, makanze aabazyali taali aakumunyonganya, pele bayanda kumugwasya kweeleba ntenda zikonzya kunyonganya lukkomano lwanu mubuumi.

 Nkaaka kaambo akamwi: Bazyali banu balayandisya kumukwabilila. Akaambo kaluyando, balakonzya kumuzumizya naa kumukasya kuti kabayandika kucita boobo. Naa mwabalomba kucita cimwi cintu, balalibuzya naa beelede kumuzumizya mpoonya akulangana amapenzi aaboola. Bayoomuzumizya camoyo woonse likke kuti basinizya kuti kunyina ntenda iiyoomucitikila.

Ncomukonzya kucita

 Kusyomeka: Amulibuzye kuti: ‘Mubwini, nkaambo nzi ncondiyandila kuunka? Sena ncakulikondelezya ncondiyanda naa ndiyanda buyo kukkomanisya beenzuma? Sena nkaambo kakuti muntu ngondinyomenena unooliko?’ Ikuti naa mbocibede oobo, mweelede kubaambila masimpe bazyali banu. Abalo bakali bakubusi aciindi cimwi, alimwi balimuzyi kabotu. Aboobo bayoozyiba cini ncomuyandila kuunka. Bayoolumba akaambo kakusyomeka kwanu, alimwi muyoogwasyigwa abusongo bwabo. (Tusimpi 7:1, 2) Kulubazu lumwi, ikuti kamutasyomeki, bayooleka kumusyoma, mpoonya tabanoomuzumizyi.

 Amuzyibe ciindi cibotu: Mutanoobalombi mbobasikila buyo aŋanda kuzwa kumulimo naa nobajisi bubi atwaambo tumwi. Amubalombe ciindi nobaliibide. Pele tamweelede kumuka mpoonya akutalika kubasungilizya kuti bafwambaane kumwiingula. Bazyali banu tabakakkomani kumwiingula cakubinda. Mweelede kufwambaana kubalomba, kutegwa mubape ciindi cakuyeeya.

 Zyintu ziyoocitika: Mweelede kupandulula cakusalazya. Amupandulule cini ncomuyanda kucita. Bazyali tabayandi kubaingula kuti “Tandizyi,” kwaambisya nobamubuzya kuti: “Ino mbaani bayoojanika?” “Sena kunooli muntu mupati?” naa “Ino ulajoka ciindi nzi kuŋanda?”

 Mbomubalanga: Bazyali banu tamweelede kubabona mbuli kuti mbaasinkondonyoko. Kamubabona kuti abalo mbeenzinyoko—nkaambo mubwini mbeenzinyoko. Ikuti bazyali banu kamubabona mbuli kuti mbaasikumugwasya, tamunookazyanyi ambabo alimwi munooendelana.

 Amubatondezye bazyali banu kuti mulabamvwida alimwi mulabalemeka. Ikuti mwacita oobo, banoomulemeka. Alimwi ciindi ciboola inga balangilwa kuyoomuzumizya.