Muntu uuli woonse ulakonzya kujanika mubukkale bukatazya. Bbaibbele lyaamba kuti: “Talili lyoonse basilubilo nobazunda mukusiyana, basinguzu talili lyoonse nobazunda munkondo, . . . boonse buyo balasikilwa ziindi zyamapenzi akucitikilwa zintu zitalangilwi.” (Mukambausi 9:11) Eeci cilabikkilizya abakubusi ibalijana mubukkale bukatazya. Ino baliyumya buti? Amubone zikozyanyo zyobilo.

•  REBEKAH

•  CORDELL

 Bazyali bangu bakalekana nindakajisi myaka iili 14.

 Ndakali kubona mbuli kuti bazyali bangu bakali kusobana buya nobakalekana, akuti bataata bakali kuyandika buyo ciindi cakuliyeeya. Mbwaanga bakali kubayanda bamaama, tiindakali kubona kaambo ncobakali kukonzya kubalekela. Alimwi kwakanyina kaambo ncobakali kukonzya kundisiya.

 Cakali kundikatazya kwaambila bamwi kujatikizya cakali kucitika. Tiindakali kuyanda akwaayeeya makani aaya. Aciindi eeco tiindakalimvwide kuti ndakalinyemede. Ndakatalika kulibilika alimwi akuba acilabila.

 Nondakakkwanya myaka iili 19, bamaama bakafwa abulwazi bwakkansa. Twakali kumvwana kapati.

 Lufwu lwabamaama lwakandicisa kapati kwiinda kulekana kwabazyali bangu. Asunu cicindicisa. Penzi lyacilabila lyakomenena limwi, alimwi ndicilibilika.

 Nokuba boobo, ndajana zintu zinji zigwasya. Mucikozyanyo, lugwalo lwa Tusimpi 18:1 lulatucenjezya kujatikizya kulizandula, aboobo ndilasoleka kulutobela lulayo oolu.

 Mbwaanga ndili umwi wa Bakamboni ba Jehova, ndilasola kubala mabbuku aakulwaizya aamba zyamu Bbaibbele. Bbuku limwi ilyakandigwasya ciindi bazyali bangu nobakalekana ndibbuku lyakuti Questions Young People Ask​—Answers That Work. Ikapati ndilayeeya kubala cibalo cili mu Volume 2 cijisi mutwe wakuti “Can I Be Happy in a Single-Parent Family?”

 Lugwalo lumwi lundigwasya kuliyumya nondilibilika ndugwalo lwa Matayo 6:​25-34. Mukapango 27, Jesu wakabuzya kuti: “Nguni akati kanu kwiinda mukulibilika uukonzya kuyungizya buumi bwakwe naaceya?”

 Zintu zibyaabi zilatucitikila toonse, pele ndakaiya kucikozyanyo cabamaama kuti ciyandika kapati nkuzyiba mbotukonzya kuliyumya. Bakainda mumapenzi manji​—kulekwa mpoonya abulwazi butaponi​—pele mumapenzi aaya woonse bakazumanana kuzilanga kabotu zintu, alimwi lusyomo lwabo muli Leza lwakazumanana kuyuma kusikila kumamanino. Tandikazilubi nzyobakandiyiisya kujatikizya Jehova.

 Ncomweelede kuyeeya: Ino kubala Bbaibbele alimwi amabbuku aamba zyamu Bbaibbele inga kwamugwasya buti kuliyumya mubukkale bukatazya?​—Intembauzyo 94:19.

 Nindakajisi myaka iili 17, bataata bakafwa kandilangilila. Kufwidwa bataata cakali cintu cicisa kapati cakandicitikila mubuumi bwangu. Ndakanyongana kapati.

 Ndakalimvwa mbuli kuti tiibakafwide ncobeni, akuti tiibakali bataata ibakali mumilembo ciindi mubili wabo nowakavwumbwa. Ndakali kuyeeya kuti bakali kuyakubuka buzuba butobela. Ndakalimvwa kubula nguzu akusweeka.

 Mebo amukwasyi wangu tuli Bakamboni ba Jehova, alimwi mbungano yesu yakagwasya kapati bataata nobakafwa. Bakatupa zyakulya, bakakkala andiswe kutali buyo kwaciindi cisyoonto pele kwaciindi cilamfwu. Ndilimvwa kuti lugwasyo ndobakapa ncisinizyo cakuti Bakamboni ba Jehova Mbaanakristo beni-beni.​—Johane 13:35.

 Lugwalo ilwandigwasya kapati ndugwalo lwa 2 Bakorinto 4:​17, 18. Lwaamba kuti: “Nokuba kuti mapenzi eesu ngakaindi buyo kaniini alimwi mauba-uba, atuletela bulemu bupati kapati butakonzyi kweezyanisyigwa alimwi ibutamani; kumwi meso eesu alanga zintu zitalibonyi ikutali zintu zilibonya. Nkaambo zintu zilibonya nzyakaindi kaniini buyo, pele izintu zitalibonyi tazimani pe.”

 Kapango kamamanino kakandigwasya kapati. Kupenga kwabataata kwakali kwakaindi kasyoonto buyo, pele ncasyomezya Leza kumbele mbuumi butamani. Lufwu lwabataata lwakandipa coolwe cakukkala ansi kubona buumi mbondakali kupona alimwi akubambulula mbaakani zyangu.

 Ncomweelede kuyeeya: Mbuti bukkale bukatazya mbobukonzya kumugwasya kulanga-langa mbaakani zyanu mubuumi?