Amubale cakamucitikila Karina, mpoonya mweezyeezye kuti cicitikila ndinywe. Ino ncinzi ncomukonzya kucita ikuti kamuli ndinywe?

 Karina: “Ndakali kubalisya mootokala nondakali kuunka kucikolo, mpoonya mupulisa wakandiimika akundipa katikiti kamulandu wakubalisya mootokala. Ndakanyema kapati! Ndakabaambila bamaama, pele balo bakandaambila kuti ndaambile bataata​—cintu ncondatakali kuyanda kucita.”

  Ino nywebo inga mwacita buti?

1.  Nzila Yakusaanguna: Kuumuna buyo, kumwi kamulombozya kuti bauso batazyibi.

2.  Nzila Yabili: Kubaambila bauso cini cacitika.

 Mulakonzya kusunkwa kusala Nzila Yakusaanguna. Kayi ambweni banyoko inga bayeeya kuti mwabaambila bauso. Pele kuli twaambo tubotu ncomweelede kwaamba kulubizya kwanu​—nokuba kuti kujatikizya mulandu wakubalisya mootokala naa cintu buyo cimwi.

1.  1. Kucita boobo cililuzi. Kujatikizya nzyobeelede kucita lyoonse Banakristo, Bbaibbele lyaamba kuti: “Tuyanda kuti katusyomeka muzyintu zyoonse.”​—Bahebulayo 13:18.

    “Ndalikubeleka canguzu kutegwa kandisyomeka alimwi akuzumina milandu iibola akaambo kakulubizya kwangu​—alimwi akufwambaana kucita oobo ciindi nondalubizya.”​—Alexis.

2.  2. Bantu cilabaubila-ubila kulekelela baabo ibazumina kulubizya kwabo. Bbaibbele lyaamba kuti: “Uusisa milandu yakwe takooyooba acoolwe pe, pele oyo uulyaambawida akuleka ulafwidwa luzyalo.”​—Tusimpi 28:13.

    “Kuyandika busicamba kutegwa muntu azumine kulubizya kwakwe, pele eeci ncecipa kuti bantu kabakusyoma. Balabona kuti ulasyomeka. Kwiinda mukuzumina kulubizya nkomwacita, mupa kuti cintu cabijide cibote.”​—Richard.

3.  3. Kwiinda zyoonse, cikkomanisya Jehova Leza. Bbaibbele lyaamba kuti: “Muntu uupilingene ulasesemya Jehova, pele bantu baluleme mbobajisi lulayo lwakwe.”​—Tusimpi 3:32.

    “Nondakalubizya, ndakabona kuti cakali kuyandika kuti ndizumine kulubizya kwangu. Jehova wakali kuyakundilongezya lilikke kuti ndacita zintu mbuli mbwayanda.”​—Rachel.

 Aboobo ino Karina wakacita buti kujatikizya kulubizya kwakwe? Wakasolekesya kubasisa bausyi katikiti kamulandu nkaakapegwa amupulisa. Pele tanaakazwidilila pe. Karina waamba kuti: “Nokwakainda mwaka omwe, bataata nobakali kulanga-langa mapepa aa insurance bakabona katikiti kamulandu wakubalisya mootokala ikakajisi zina lyangu. Eeci cakandinjizya mupenzi​—nobaba bamaama bakanyema nobakazyiba kuti tiindakacita ncobakandaambilide kucita!”

 Ncondakaiya: Karina waamba kuti: “Ikusisa kulubizya nkowacita ciletela buyo mapenzi manji. Nokuba kuti wasisa, ulakonzya kujatwa kumbele!”

 Muntu uuli woonse ulalubizya. (Baloma 3:​23; 1 Johane 1:8) Alimwi kuzumina kulubizya kwesu ncitondezyo cakulicesya alimwi akusima, alimwi kuyandika kucita oobo cakufwambaana.

 Mwamana kucita boobo, mweelede kwiiya kukulubizya kwanu. Cuusisya ncakuti, bakubusi bamwi taakwe ncobaiya kukulubizya kwabo! Inga balimvwa mbwaakalimvwa musimbi wazina lya Priscilla. Wakaamba kuti: “Ndakali kutyompwa kapati kujatikizya kulubizya kwangu. Ndakali kulitenga, aboobo kulubizya kwangu ndakali kukubona mbuli cintu cilema kapati ncondatakali kukonzya kunyamuna. Cakali kundityompya kapati akulimvwa kuti ndaalilwa.”

 Sena andinywe zimwi ziindi mbomulimvwa oobo? Naa mboobo, kamuyeeya kaambo aaka: Kubikkila maano kuzintu nzyomwakalubizya kaindi cili mbuli kulanga mugilazi yamootokala iitondezya zintu zili musyule nomweenzya mootokala. Kubikkila maano zintu zyakacitika kaindi inga camupa buyo kulimvwa kubula mpindu alimwi akubula nguzu kutegwa mulwane buyumu-yumu bwakumbele.

 Muciindi caboobo, amuzilange munzila yeelede zintu.

 “Amulange-lange zintu nzyomwakalubizya kaindi, akwiiya kulinzizyo kutegwa mutakaciinduluki kuzicita. Pele mutakubikkili kapati maano cakuti camupa kutyompwa.”​—Elliot.

 “Ndilasoleka kubona ncondiiya kukulubizya kumwi akumwi calo cindigwasya kuba muntu uuli kabotu akucita zintu munzila iindene kumbele. Ncibotu kuyeeya boobu nkaambo cigwasya muntu kukomena mumizeezo.”​—Vera.