“Ciindi nondilibambila zyakucita buzuba oobo, ndilalizya nyimbo. Ndanjila mumootokala, ndilalizya nyimbo. Ndanooli aŋanda kandilyookezya, kusalazya naa kubala​—inga nyimbo zilalila. Ciindi coonse inga ndiswiilila nyimbo.”​—Carla.

 Sena andinywe mulimvwa mbuli Carla mbwalimvwa kujatikizya nyimbo? Ikuti naa mbomulimvwa oobo, cibalo eeci cilamugwasya kubona bubotu bwakuswiilila nyimbo, mbomukonzya kweeleba ntenda zyakuswiilila nyimbo, alimwi ambomukonzya kusala kabotu nyimbo.

•  Bubotu bwakuswiilila nyimbo

•  Ntenda ziliko mukuswiilila nyimbo

•  Nzyobaamba beenzinyoko

 Kuswiilila nyimbo kulakonzya kweezyanisyigwa akulya cakulya. Mbubwenya mbomukonzya kugwasyigwa ikuti naa mwalya cakulya cili kabotu alimwi cansaizi, azyalo nyimbo inga zyamugwasya kuti muswiilila zili kabotu alimwi cansaizi. Atubone twaambo tutobela:

•   Nyimbo zilakonzya kupa kuti mulimvwe kabotu.

   “Ikuti naa buzuba bwandibijila, ndilalizya nyimbo nzyondiyandisya kapati alimwi ndilafwaambaana kulimvwa kabotu.”​—Mark.

•   Nyimbo zilakonzya kumuyeezya zintu zyakaindi.

   “Kanji-kanji, inga nyimbo indiyeezya cintu cibotu cakacitika, aboobo inga ndilakkomana lyoonse ndaiswiilila.”​—Sheila.

•   Nyimbo zilakamantanya.

   “Ndakali kumuswaangano wamasi wa Bakamboni ba Jehova, ciindi beenzu boonse nobakali kwiimba lwiimbo lwamamanino, yakandeenda misozi. Twakali kwaambaula myaambo iindene-indene, pele nyimbo zyakatukamantanya.”​—Tammy.

•   Nyimbo zilakonzya kumugwasya kuba abube bubotu.

   “Kwiiya kulizya ciimbyo kulakonzya kumugwasya kukkazika moyo. Tacili cintu ncomukonzya kuzyiba cakufwambaana. Nzila ilikke iikonzya kupa kuti mucikonzye, nkusola-sola.”​—Anna.

 Sena mwalizyi? Bbuku lipati lyamu Bbaibbele, bbuku lya Intembauzyo, lijisi nyimbo zili 150.

 Nyimbo zimwi, mbubwenya mbuli cakulya cisofweede, zilakonzya kumunyonganya. Amulange-lange kaambo ncocili boobo.

•   Nyimbo zinji zijisi majwi aamba makani aakoonana.

   “Cilibonya mbuli kuti nyimbo zyoonse zidumide kapati zyaamba buyo makani aakoonana. Tabacifwi nsoni buya akwaamba.”​—Hannah.

   Bbaibbele lyaamba kuti: “Bwaamu abusofwaazi bwamusyobo uuli woonse naa busyaacivwulemwangu tazyeelede nokuba kwaambwa akati kanu pe.” (Baefeso 5:3) Amulibuzye kuti, sena nyimbo nzyondiswiilila zipa kuti kanditalutobeli lulayo oolu?’

•   Nyimbo zimwi zilakonzya kumupa kuusa.

   “Zimwi ziindi ndilabuka masiku akuswiilila nyimbo zindipa kuyeeya bukkale buusisya. Nyimbo zyabuumba inga zipa kanduusa.”​—Tammy.

   Bbaibbele lyaamba kuti: “Akati kazintu zyoonse nzyokwabilila, kokwabilila kapati moyo wako.” (Tusimpi 4:​23) Amulibuzye kuti, ‘Sena nyimbo nzyondiswiilila zipa kuti kandibikkila maano kuzintu zityompya?’

•   Nyimbo zimwi inga zyamupa kuba bakali.

   “Nyimbo zijisi majwi aabukali, nkakole kulindime. Ndakabona kuti inga ndilacinca mbondilimvwa ndaswiilila nyimbo zili boobu. Abalo banamukwasyi bakacibona eeci.”​—John.

   Bbaibbele lyaamba kuti: ‘Amuzigusye zyoonse eezyi kulindinywe: bukali, kunyema, bubi, majwi aakusampaula, alimwi kutazwi majwi aacisapi kumulomo wanu.” (Bakolose 3:8) Amulibuzye kuti, ‘Sena nyimbo nzyondiswiilila zipa kuti kandili mukali, naa ambweni kutafwida luse bamwi?’

 Ncinzi cikonzya kugwasya? Kamusala. Eeco ncasola kucita mukubusi wazina lyakuti Julie. Waamba kuti: “Lyoonse ndilazilanga-langa nyimbo nzyondijisi kutegwa ndizimwaye eezyo zitali kabotu. Tacili cuuba-uba, pesi ndilizyi kuti nceciluzi.”

 Mukaintu uucili mwana wazina lyakuti Tara awalo wakaiya ciiyo. Waamba kuti: “Zimwi ziindi awailesi kulila nyimbo mbotu, pele ndaswiilila majwi ndibona kuti ndeelede kucinca nzyondiswiilila. Kucita boobo cili mbuli kuleka cakulya cinona kapati mbondacikunya buyo. Pele kuti ndacikonzya kutaswiilila nyimbo zyaamba makani aakoonana, nkokuti ndiyoocikonzya kutacita bwaamu kanditanakwatwa. Tandiyandi kuubya-ubya ntenda ziliko munyimbo nzyondiswiilila.”